د جمهور رئیس خبرې
له جغرافیایي اړخه د آسیا په زړه کې په موقعیت او له تاریخي اړخه د هند د شبه‌قارې د دروازې په توګه، افغانستان اماده دی، چې د آسیا د څلور لارې په توګه عمل وکړي. دا مرسته نه ده، بلکې مارکېټ، ترانزیټي پانګونې او سیمه ییزو همکاریو ته لاسرسی دی، چې موږ د هغه له لارې د نړیوال او سیمه‌ییز ثبات د عامل په توګه د پرمختللو دولتونو او هېوادونو په کتار کې د خپل برحق مقام د ترلاسه کولو په لټه کې یوو.

د مطبوعاتو ریاست

مطبوعاتو ریاست، د جمهوري ریاست عالي مقام دفتر لوی ریاست په چوکاټ کې د رسنیو او ستراتېژیکو اړیکو معاونیت تر چتر لاندې فعالیت کوي. دا ریاست هماغسې چې له نامه یې ښکاري، د عالي مقام دفتر لوی ریاست مطبوعاتي چارې پرمخ وړي.

د مطبوعاتو ریاست عمومي اهداف عبارت دي له:

  • د معلوماتي خلا له منځه وړو، د حکومت او خلکو ترمنځ د عامه پوهاوي رامنځته کولو او پر وخت د جمهوري ریاست بنسټ د کړنو په اړه د دقیقو معلوماتو د تبادله کولو په موخه د یوه فعال معلوماتي سیستم لرل
  • د انتقادونو، وړاندیزونو او د عامه افکارو د مختلفو نورو زاویو په اړه د واضحو او دقیقو اطلاعاتو ترلاسه کولو په موخه د عامه افکارو پېژندل
  • د موادو د تولید او رسنیزې محتوا او له مختلفو وسیلو څخه په استفادې د هغو د خپرولو له لارې، د حکومت د کار‌کړنو او پروګرامونو په اړه د عامه اذهانو روښانول
  • د پروسس شویو اطلاعاتو پر اساس د پرېکړو د تګلارې بنسټیزه کول او د جمهوري ریاست بنسټ تخنیکي ملاتړ

خپلو اهدافو ته د رسېدو لپاره مطبوعاتو ریاست لاندې فعالیتونه ترسره کوي:

  • د خلکو د وړاندیزونو او انتقادونو د ترلاسه کولو لپاره له ټلویزیونونو، راډیوګانو، برېښنایي او چاپي رسنیو څخه د تحلیلي راپورونو راټولول او د سروې ګانو برابرول
  • د رسنیو له لارې له خلکو سره د معلوماتو شریکول او د حکومت د کار‌کړنو او لاسته راوړنو په اړه د وضاحت وړاندې کول
  • د فلم، انفوګرافیک، د جمهوررئیس بیاناتو، مقالو، کتابونو، معلوماتي ټولګو، کالیزو، خبرونو په چوکاټ کې د حکومت د لاسته راوړنو په تړاو د عامه پوهاوي موادو تولید او خپرول
  • د عامه پوهاوي له متنوع وسیلو څخه د استفادې پراختیا


شریکول