د جمهور رئیس خبرې
د افغانستان د ملت او دولت اراده د سولې لپاره ده. که موږ د سوله‌ییزې حللارې خنډ وای، نن به یې دې جګړې ته مشروعیت ورکولای. موږ سولې ته ژمن یوو او دا ددې لپاره چې خلک سولې ته لکه د هوا په څېر اړتیا لري؛ خو باید اراده ولرو، چې په واقعي ډول سوله راوړلی شو. هغه سوله چې په هغه کې خدای نخواسته د افغانستان جغرافیه ووېشل شي، هېڅکله د منلو نه ده.

خبرې

تر هغو چې په ټولنه کې یو قوي دولت موجود نه وي، د پایداره سولې شاهدان به ونه اوسو. قوي دولت د شخصي قدرت لرلو په معنی نه دی؛ بلکې د قانون حاکمیت، اساسي قانون تطبیق او له هر افغان سره د بل افغان د برابرۍ ټینګښت دی.

د افغانستان ښکلا، قوت او ثبات ددې خاورې د برابرو او مساوي قومونو او د خلکو په وجود کې دی. زما لپاره تر دې لوی ویاړ نشته، چې زه په ویاړ د هغوی استازیتوب کوم.

افغانستان له سیاسي اړخه، د غوره نسلي بدلون شاهد دی. زموږ نیمه کابینه له څلویښتو کلونو کم عمر لري. دا کار د هغه هېواد لپاره چې څلویښت کاله په جګړه کې ښکېل دی، د هیلو یوه خارق العاده لار ده.

موږ د امنیتي او دفاعي ځواکونو د قربانیو په برکت نړۍ قانع کړې او دا مهال افغانستان د نړیوالې ټولنې د توجه محور ګرځېدلی. د افغانستان په تړاو دا اجماع له ۴۰ کلونو وروسته رامنځته شوې. موږ د قانونیت، عدل او تدبیر له لارې نظام غښتلی کوو او زما په ګډون هېچاته اجازه نشته، چې د هېواد ملي ګټې تر پښو لاندې کړي.

ټول باید بشپړ باور ولرو چې زموږ امنیتي او دفاعي ځواکونه چې د خپلې وینې او ځان په بدله کې څه لاسته راوړي، د سیاست په ډګر کې به له لاسه ور نه کړل شي. دولت په ټوله معنی له هغوی دفاع کوي.

قران مجید فرمایلي: والصُّلحُ خیرٌ. یعنې سوله غوره ده. سوله غوره انتخاب دی، دا یوازې زموږ د خلکو لپاره نه، بلکې ان د هغو کسانو لپاره هم چې د بغاوت په سنګر کې دي. زه له همدې ځایه یو وار بیا د طالبانو په ډلو غږ کوم، چې الهي غږ، د خلکو غوښتنې او د جهاد د رهبرانو مخلصانه هڅو ته احترام وکړي او د سولې غږ ته لبیک ووایي. کله چې د خبرو او مذاکرې لار پرانستې، تاوتریخوالي ته څه حاجت؟ هغوی دې الهي امر ته څه ځواب لري چې د انفال سورت په ۶۱ ایت کې فرمایي: «که مو ولیدل چې مخالفین مو سولې او روغې ته لېوالتیا لري، تاسو هم سولې ته مخ کړئ.»

د افغانستان د ملت او دولت اراده د سولې لپاره ده. که موږ د سوله‌ییزې حللارې خنډ وای، نن به یې دې جګړې ته مشروعیت ورکولای. موږ سولې ته ژمن یوو او دا ددې لپاره چې خلک سولې ته لکه د هوا په څېر اړتیا لري؛ خو باید اراده ولرو، چې په واقعي ډول سوله راوړلی شو. هغه سوله چې په هغه کې خدای نخواسته د افغانستان جغرافیه ووېشل شي، هېڅکله د منلو نه ده.