د جمهور رئیس خبرې
زموږ ژمنه دا ده، چې سوله به ټینګوو او د هر ډول احتمالي فاجعې او پاشلتیا مخه به نیسو، خو داسې ارزښتونه هم موجود دي، چې بحث پرې نشي کېدای لکه ملي یووالی، ملي حاکمیت، ځمکنۍ بشپړتیا، مرکزي، قوي او کار وړ دولت او د اتباعو اساسي حقوق.

د ۳٫۳۷ میلیارد افغانیو په ارزښت ۲۱ تدارکاتي موارد په ملي تدارکاتو کمېسیون کې منظور شول

۲۴ لړم ۱۳۹۷

د جمهور رئیس محمد اشرف غني په مشرۍ د ملي تدارکاتو کمېسیون په یو سل او یو اویایمه غونډه کې، د ۲۶ تدارکاتي مواردو تر ارزولو وروسته، د ۳٫۳۷ میلیارد افغانیو په ارزښت ۲۱ تدارکاتي موارد منظور شول.

په منظور شویو قراردادونو کې، د دایکنډي ولایت په شهرستان ولسوالۍ کې له ملحقاتو سره یو ځای د ۲۴ ټولګیو جوړولو پروژه؛ د صکوکو اسنادو مطبعې د روزنیز مرکز جوړول؛ د چوکاټي قانون پر اساس د ۶۰۶ انصار زون د پولیسو ځواکونو اړتیا وړ ۲۱ قلمه اعاشوي توکو ورکړه؛ له خواجه غار ولسوالۍ تر دشت قلعه ولسوالۍ پورې د ماورای کوکچه سړک جوړول؛ د دولت ــ دولت قرارداد له لارې له ایران څخه د  STM-16  ظرفیت لرونکي بندویټ انټرنېټ تدارک؛ د پنجصد فامیلي د  D- 4 ,3  بلاکونو ساختماني چارې؛ د مکروریانونو د څارنې تصدۍ ریاست د مرکز ګرمۍ دستګاه لپاره د ۳۵۰۰ ټنه ډیزل اړتیا وړ تېل؛ له کارته نو تر حلقوي سړک پورې د رحمان مېنې د E برخې سړک جوړول؛ د توبرکلوز پروګرام د اړتیا وړ فلتر او تشخیصیه وسایلو او ماشینونو تدارک او برابرول؛   د ICU پروژې تر پوښښ لاندې د جدي څارنې د واحد د عاجلو برخو د اړتیا وړ ۱۵۹ قلمه لازمو طبي وسایلو تدارک او برابرول؛ د چوکاټي قرارداد له لارې د ۸۲ اطفائیو دوامداره څارنه او ترمیم؛ د ملي دفاع زارت د ستر‌درستیز د مخابرې ریاست د اړتیا وړ خدمتونو او اړیکو د ټینګښت لپاره د ستراتېژیکې شبکې جوړول او انکشاف؛ د ملي دفاع وزارت د ستر‌درستیز د ثریا سټلایټ مخابرو لپاره په میاشتني ډول د Prepaid Service یا په برېښنایي ډول د کرېډېټ لېږد یو قلم کارت تدارک؛ د ملي دفاع وزارت د فوق‌العاده او اضطراري حالاتو ریاست لپاه د ۳ اطفائیو برابرول او د مچلغو بند د جوړونې او ډیزاین پروژې قرارداد لغوه، شامل دي.

پر دې سربېره د کرنې وزارت د مشورتي خدمتونو د پروژې د تعدیل منظوري؛ د فراه ولایت د بخش‌آباد د اوبونې او برېښنا د تولید بند د تفصیلي ډيزاین پروژې د وخت تمدید؛ د ستر‌درستیز د صحیه قوماندانۍ د اړتیا وړ ۱۳۲ قلمه طبي درملو تدارک او برابرول د لا زیاتې ارزونې په موخه سیستکا ادارې ته وګرځول.

په دې غونډه کې، د ملي شورا د مالي، بودجوي او ملي اقتصاد کمېسیونونو، د افغانستان د روڼتیا څار بنسټ او د غوڅ ملاتړ سیستکا څخه ملي او نړیوالو څارونکو هم برخه اخیستې وه.


شریکول