د جمهور رئیس خبرې
زموږ ژمنه دا ده، چې سوله به ټینګوو او د هر ډول احتمالي فاجعې او پاشلتیا مخه به نیسو، خو داسې ارزښتونه هم موجود دي، چې بحث پرې نشي کېدای لکه ملي یووالی، ملي حاکمیت، ځمکنۍ بشپړتیا، مرکزي، قوي او کار وړ دولت او د اتباعو اساسي حقوق.

له ۱۱٫۸ میلیارد څخه د زیاتو افغانیو په ارزښت ۴۸ تدارکاتي موارد په ملي تدارکاتو کمېسیون کې منظور شول

۱۴ سلواغه ۱۳۹۷

د جمهوررئیس محمد اشرف غني په مشرۍ د ملي تدارکاتو کمېسیون په یو سل اوه اتیایمه اونیزه غونډه کې، ۵۰ تدارکاتي موارد وارزول شول، چې له هغې ډلې له ۱۱٫۸ میلیارد څخه د زیاتو افغانیو په ارزښت ۴۸ مورده یې منظور شول.

په عمده منظور شویو پروژو کې، په اتو ولایتونو کې د روغتیایي خدمتونو د وړاندې کولو په موخه د غیرمشورتي خدمتونو تدارک قرارداد؛ د افغانستان د فضایي کنټرول ۳۵ سټېشنونو څارنه او ساتنه؛ د کابل سیند د پاکولو او استحکاماتو پروژې څلور قراردادونه، په ننګرهار ولایت کې د پاچا خان مقبرې ترمیم، د شاهي ماڼۍ ترمیم؛ د آی‌ایس‌پي شبکې او ملحقاتو د تدارک دوه قراردادونه؛ د سترې محکمې د ۳۹۰ زره لیټره ډيزلو او پټرولو د تدارک قرارداد؛ د ملي دفاع وزارت د ستر‌درستیز د استخباراتو او کشف ریاست د ۳  قلمه امنیتي او استخباراتي تجهیزاتو قرارداد؛ او د لویې څارنوالۍ د ډيزلو او پټرول تېلو د تدارک قرارداد شامل دي.

په هرات او نیمروز ولایتونو کې د اساسي روغتیایي او اساسي روغتوني خدمتونو د وړاندې کولو لپاره د غیرمشورتي خدمتونو د تدارک پر پروژې د بحث پر مهال، دغه پروژې په پرنسیپ کې تأیید شوې او ملي تدارکاتو ادارې ته لارښوونه وشوه، څو د یادو ولایتونو تدارکاتي پروسې او شکایتونه بررسي کړي.

همداراز په دې غونډه کې تر بررسۍ او دقت وروسته د ۸ پروژو د تعدیل وړاندیز د ملي تدارکاتو کمېسیون له لوري تأیید شو او په دې اړه د ملي تدارکاتو کمېسیون د پخوانیو پرېکړو د راپور تحقق هم بررسي شو.

په دې غونډه کې د افغانستان د روڼتیا څار بنسټ، د کورنیو چارو او ملي دفاع وزارت د منسوبینو شکایتونو ته د رسېدنې په برخه کې د یادو وزارتونو د نه همکارۍ له امله، ملي تدارکاتو کمېسیون ته د لارښوونو وړاندیز وکړ. جمهوررئیس اشرف غني په دې تړاو ټینګار وکړ، چې اطلاعاتو ته د لاسرسي قانون پر اساس باید ټول بنسټونه د افغانستان د روڼتیا څار بنسټ سره همکاري وکړي.

په دې غونډه کې د ملي شورا مالي، بودجوي او اقتصاد کمېسیونونو، د افغانستان د روڼتیا څار بنسټ، د افغانستان د بیارغاونې لپاره د امریکا متحده ایالتونو ځانګړي څارونکي استازي (سیګار) او د غوڅ ملاتړ سیستیکا څخه ملي او نړیوالو څارونکو هم برخه اخیستې وه.


شریکول