د جمهور رئیس خبرې
موږ، د افغانستان ډېری خلک، په لېوالتیا هغه لیدلوری تعقیبوو، چې وکولای شو د افغانستان اسلامي جمهوریت نظام بنسټونه پخپله جوړ کړو؛ په هېواد کې د سولې، یووالي او ملي پیوستون خاوندان شو او د سیمه‌ییز اتصال، د اسلامي زده کړو مرکز او د آسیا څلور لارې د محور په توګه د سیمه‌ییزو او نړیوالو همکاریو د بستر په توګه عمل وکړو.

وروستیو سیلاب‌ځپلو ته رسېدنه کېږي

۳۱ وری ۱۳۹۸

د جمهور رئیس محمد اشرف غني په مشرۍ د کابینې په غونډه کې، په کابل او ولایتونو کې وروستیو سیلاب‌ځپلو ته د رسېدنې په تړاو؛ د سیلابونو د مدیریت او مخنیوي پر میکانېزم او د سطحي اوبو د مدیریت پر طرحې بحث وشو.

جمهور رئیس غني په کابل او ولایتونو کې وروستیو سیلاب‌ځپلو ته د مرستو او همکاریو په رسولو کې د امنیتي او دفاعي ځواکونو، د کابل ښاروالۍ او اړوندو بنسټونو ستاینه وکړه.

هغه همداراز اړوندو بنسټونو ته لارښونه وکړه، چې په راتلونکو ۴۸ ساعتونو کې په کمپنۍ ساحه کې د وسایطو د تګ راتګ ستونزې د حل په موخه موقتي پُل جوړ کړي او د سیلابونو د مدیریت په موخه د کابل سیند د پاکولو لپاره اقدام وکړي.

کابینې تر بحث وروسته لارښونه وکړه، چې په مرکز او ولایتونو کې د سطحي اوبو د مدیریت طرحه او د سیلابونو د مدیریت او مخنیوي میکانېزم ترتیب شي او کابل ښاروالۍ دې د کابل ښار وروستیو سیلاب‌ځپلو ته د رسېدنې په موخه له اړوندو ادارو سره په همغږۍ اقدام وکړي.


شریکول