عمومی ریاست مقامی
افغانستان اسلامی جمهوریتی عالی مقامی ریاستی عمومی دفتر باشلیغی محمد شاکر کارگرنینگ شرح حالی
الحاج استاد وکیل عبدالرسول کارگرنینگ اوغلی حرمتلی محمد شاکر کارگر فاریاب ولایتی نینگ فرهنگ و مدنیت سیور و باستانی شهری بولمیش اندخوی اولسواللیگی نینگ کارگرخانه قیشلاغیده ضیالی، مدنیت سیور بیر عایله‌ده دنیاگه کیلدی.
محمد شاکر کارگرنینگ بووَه‌لری حاجی وکیل نادر نیاز کارگر و وکیل احمدخان کارگر ایکاولری هم قویاش 1307- ییلده امیر امان الله خان زمانیده ولسی جرگه و 1310- یییل لویه جرگه ده فاریاب ولایتی خلقی نینگ وکیلی صفتیده خذمت قیلگنلر.
محمد شاکر کارگر منه شونده‌ی بیر عایله نینگ قوچاغیده اولغه‌ییب اوسگن دیر.
او، 1352- ییلده مکتب نینگ باشلنغیچ دورینی اندخوی مرکزی، مکتب نینگ اورته دورینی کابل شهری نینگ شاه شهید مکتبیده بیتتیریب و لیسه دورینی اندخوی نینگ ابو ملسم لیسه‌سیده بیرینچی مقامنی آلیش بیلن یکونلنتیردی. سونگ، تحصیلنی دوام بیریش و بیلیم سویه‌سینی آشیریش مقصدیده کابل کیلدی. 1363دن 1364- ییلگه قدر کابل بیلیم یورتی نینگ آماده‌لیک کوریش فاکولته‌سیده تحصیل‌گه دوام بیرگن کارگر، 1364- ییلده تحصیلی بورسیه‌دن فایده‌له‌نیب اوشه وقت نینگ شوروی بیرلشمه‌سی اولکه‌سیگه کیتدی. حقوق و تاریخ بوییچه عالی تحصیلاتنی حرتسن سانکت پترزبورگ دولت بیلیم یورتیده بیتتیرگندن سونگ شاکر کارگر 1370- ییلده منه شو بیلیم یورتدن ماسترلیک حجتنی هم قولگه کیریتدی. او، شونینگدیک، 1390- ییلده دوکتورلیک حجتنی مذکور بیلیم یورتده خلق ارا حقوق بولیمیده قولگه کیریتدی. ایتیش کیره‌ک که، سونگگی 250 ییل ایچیده بو بیرینچی مرته افغانستانلیک محمد شاکر کارگرگه بیریلگن اوشبو بیلیم یورت نینگ دنیاده‌گی 50- فخری دوکتوراسی دیر.
محمد شاکر کارگر تینچلیک تامینله‌نیشی و افغانستا‌نده برقرار بیر دولت ایجاد بولیشی اوچون ملی و خلق ارا اتاقلی سیاستچیلر بیلن اوچره‌شیب ملاقاتلر اوتکزگن. شونینگ اوچون هم او ایریم خلق ارا ییغینلر و کنفرانسلرده قتنه‌شیش اوچون ایریم دولتلر جمله‌دن امریکا، کانادا، هالند، تورکیه، ایتالیا و منفعتی مشترک بولگن مملکتلرگه سفر قیلگن. عین دَمده کارگر جنابلری، بُن کنفرانسیده افغانستان جمهوریتی نینگ اورین باسری و سوو برق وزیری همده انتقالی حکومتده سوو برق وزیری صفتیده وظیفه بجرگن.
محمد شاکر کارگر 1384- ییلی پارلمان سیلاولریده فاریاب ولایتی بویلب اینگ یوقاری راینی آلیب فاریاب خلقی نینگ سیلنگن وکیلی صفتیده تنلندی. او، پارلمان نینگ خلق ارا کمیسیونی نینگ اورین باسری حیثیده خذمت قیلدی.
قویاش 1391- ییل بیرینچی مرته آذربایجان جمهوریتی اوچون افغانستان اسلام جمهوریت دولتی نینگ بویوک ایلچیسی همده فوق العاعده نماینده‌سی اوله‌راق تعیینله‌نیب افغانستان نینگ باکوده ایلچیلیگینی آچدی.
شوکبی کارگر جنابلری، 8/8/ 1392- ییل، جمهورلیک ریاستی عالی مقامی نینگ 5046 سانلی حکمی اساسیده تجارت و صناعت وزیرلیگی نینگ نامزدی صفتیده تنله‌نیب ولسی جرگه اعضالری نینگ کوپچیلیک ایشانچ رایی‌نی آلیب رسماً تجارت و صناعت وزیری بولدی.
او، 1393- ییلدن 1398- ییلگچه افغانستان اسلام جمهوریت جمهور رئیسی نینگ مخصوص نماینده‌سی اوله‌راق منفعتی مشترک بولگن ممکتلرده وظیفه بجردی.
کارگر جنابلری،11/1/ 1399- ییل، جمهورلیک ریاستی عالی مقامی نینگ 6 سانلی فرمانی اساسیده افغانستان اسلامی جمهوریتی عالی مقامی ریاستی نینگ عمومی دفتری باشلیغی عنوانیده تعیینلندی.