افغانستان اسلامی جمهوریتی جمهور رئیسی نینگ محجوز و محبوسلر مجازاتی کیچیریلیشی، تحقیقی آرتگه قالدیریلیشی و حکم تنفیذی گه مهلت بیریلیشی باره‌سیده‌گی مخصوص فرمانی

۰۷ حمل ۱۳۹۹

افغانستان اساسی قانونی آلتمیش تورتینچی ماده سی نینگ (۱۸) جزئی حکمی، افغانستان کابینه سی نینگ (۱) سانلی و ۲/۱/۱۳۹۹ تاریخلی مصوبه سی و شاشیلینچ کمیته سی (۲) سانلی ۲۹/۱۲/۱۳۹۸ تاریخلی فیصله سی اساسیده  آزادلیک دن محروم ایتیلگن محله لرده کرونا ویروس ترقه‌ لیشی نینگ آلدینی آلیش بوییچه احتیاطی تدبیر آلیش اوچون، حجز و حبس گه محکوم ایتیلگن شخصلر مجازاتی کیچیریلیشی، تحقیق کیچیکتیریلیشی و حکم تنفیذی گه مهلت بیریلیشینی قوییده‌گیچه منظور قیله‌من:

محجوز و محبوسلر جزاسی کیچیریلیشی

بیرینچی ماده:

جرملری عیاللر قرشیسیده زوروانلیکلرنی منع ایتیش و جزایی اجراات قانونی نینگ ۳۵۰ ماده سیگه شامل بولمه‌گن همده مالی تادیاتلرینی بیرگن محجوز و محبوسلر قوییده‌گیچه کیچیریلیب و قوییب یوباریلسین:

۱- محجوز و محبوس عیاللرنینگ اوتگن قماق مدتی نظرده آلینمه‌ی قالگن حجز و حبس مدتلری؛

۲- بیش ییل حجز و حبس گه محکوم ایتیلگن محجوز و محبوس ایرککلر مجازاتی نینگ قالگن مدتی و یا حجز و حبس مدتی دن اینگ کوپ بیش ییل قالگن بولسه؛

۳-- بیش ییل دن کوپراق حجز و حبس گه محکوم ایتیلگن محجوز و محبوس ایرککلر مجازاتی نینگ قالگن مدتی، حجز یا حبس مدتی نینگ یریمینی قماقده اوتکزگن بولسه؛

۴- ایللیک بیش یاشنی تولدیرگن محبوسلرنینگ اوتکزگن حبس مدتلری نظرده توتیلمه‌ی، قالگن حبس مدتی.

دوالنمه‌یدیگن کسللیکلرگه یولیققن محبوس و محجوزلر کیچیریلیشی

ایککینچی ماده:

(۱) دوالنمه‌یدیگن کسللیکلرگه یولیققن محبوس و محجوزلرنینگ قالگن حجز و حبس زمانی (۱۳۱۸) سانلی و ۲۹/۷/۱۳۹۷ تاریخلی جریده ده نشر ایتیلگن جزایی اجراات قانونی نینگ ۳۵۰ ماده سی تعدیلی نظرده توتیلگن حالده کیچیریلیب و قوییب یوباریله‌دی.

(۲) ساغلیقنی سقلش وزیرلیگی مرکز و ولایتلرده‌گی عامه ساغلیک ریاستلری آرقه‌لی دوالنمه‌یدیگن کسللیکلرگه یولیققن کسل محجوز و محبوسلرنی تشخیص ایتیش اوچون تجربه‌لی و مسوولیتلی بیر صحی تیمنی تعیین و بو فرمان نی تطبیق ایته‌دیگن کمیسیون، ولایتلرده‌گی صحی تیم نظری اساسیده بو ماده نینگ (۱) فقره سینی رعایت ایتیش بیلن بو مورد ده اقدام قیلیشلری کیره‌ک.

تحقیق کیچیکتیریلیشی و حکم تنفیذی گه مهلت بیریلیشی

اوچینچی ماده:

لوی څارنواللیک محبوس و محجوزلرنینگ حبس و حجز و توقیف و تنفیذ متهملرینی  جزایی اجراات قانونی نینگ ۱۶۲ و ۳۳۲ احکامی و ۳۳۳  ماده سینی رعایت ایتگن حالده ترتیب بیلن تعویق و تاجیل ایتیشگه مکلف دیر.

ایچکی و تشقی امنیت گه قرشی جرملر محکوملری

تورتینچی ماده:

بو فرمان ایچکی و تشقی امنیت گه قرشی جرملر محکوملری حقیده تطبیق ایتیلمه‌یدی، بو حقده آلدین اَیری فرمان صادر ایتیلگندی، شونگه کوره اجراات ایتیله‌دی.

تطبیق ایتووچی مرجع

بیشینچی ماده:

(۱) بو فرمان مرکز و ولایتلرده تیزده تطبیق ایتیلیشی اوچون، تیگیشلی ولایتلر معاونلری ریاستی آستیده قوییده‌گی شخصلر عضویتی بیلن کمیسیونلر توظیف ایتیله‌دی:

۱- تیگیشلی ولایتلر احکام تنفیذی څارنوالی؛

۲- بشری حقلر ایرکین کمیسیونی نماینده سی؛

۳- قماقخانه لر ایشلرینی تنظیم ایتووچی اداره نماینده سی؛

۴- تیگیشلی ولایتلر عدلیه رئیسی؛

۵- ملی امنیت عمومی ریاستی حقوقی مصلحتچیلیگی نینگ نماینده سی مرکزی کمیسیونده؛

۶- ایچکی ایشلر وزیرلیگی نینگ پالیسی معاونیتی نماینده سی مرکزی کمیسیونده؛

۷- فرمانلر تطبیقی څارنوال رئیسی عضو صفتیده مرکزی کمیسیونده.

(۲) فرماننی تطبیق ایتووچی کمیسیونلر بو فرماننی دقت بیلن اوقیب و مسئولیتلرینی درک ایتیب (۱۰) کون ایچیده تطبیق ایتیشگه مکلف دیرلر و هرات ولایتیده خاص حالت بولگنی اوچون ایشلرینی تیز و جدی شکلده قیلیشگه موظف دیرلر.

(۳) مرکز و ولایتلرده‌گی کمیسیونلر کیچیریم فرمانینی تطبیق ایتگندن سونگ قوییب یوباریلگن شخصلر لیستینی توحید ایتیش اوچون لوی څارنواللیککه و او ییردن افغانستان اسلامی جمهوریتی عمومی امور اداره سیگه یوباره‌دی.

(۴) بو فرمان نینگ اوچینچی ماده سیگه سیغدیریلگن حکم تطبیقی قنده‌یلیگی قماقخانه لر ایشلرینی تنظیم ایتووچی اداره، لوی څارنواللیک و تیگیشلی محکمه لر عهده سیگه دیر.

حق العبدلیک دعواسی اقامه سی

آلتینچی ماده:

بو فرمان احکامی تطبیقی، شخصلرنینگ حق العبدلیک دعواسی اقامه سیگه توسیق بوله‌آلمه‌یدی.

ساغلیقنی سقلش وزیرلیگی نینگ تدبیرلری

ییتتینچی ماده:

(۱) مرکزده ساغلیقنی سقلش وزیرلیگی و ولایتلرده عامه ساغلیک ریاستلری قوییب یوباریلگن محبوس و محجوزلرنی صحی معاینه ایتیب کرونا ویروس گه یولیققنی گه شبهه بولسه کیره‌کلی تدبیرلرنی آلیشگه مکلف دیرلر.

(۲) ساغلیقنی سقلش وزیرلیگی بو فرمان اساسیده برچه قماقخانه لردن قوییب یوباریلمه‌گن محبوس و محجوزلرنی، قماقخانه لر ایشلرینی تنظیم ایتووچی اداره بیلن هماهنگ شکلده کرونا ویروس گه یولیقمسلیگی اوچون جدی تیارگرلیک و وقایوی و معالجوی تدبیرلر آلیشگه مکلف دیر.

انفاذ و پیگیرلیک

سککیزینچی ماده:

بو فرمان توشیح ایتیلگن تاریخ دن نافذ و افغانستان اسلامی جمهوریتی جمهورلیک ریاستی عمومی امور اداره سی اونینگ تطبیقی گه هماهنگلیک قیلیش و کوزه‌تیش مسئولی دیر.

محمد اشرف غنی

افغانستان اسلامی جمهوریتی جمهور رئیسی

 


اولَش