جمهور رئیس غنی: تینچلیک نه ‌فقط ایستک، بلکه‌ بیز نینگ دالضرب احتیاجیمیز دیر

۱۰ حمل ۱۴۰۰

افغانستان اسلامی جمهوریتی جمهور رئیسی محمد اشرف غنی اشتراکیده  تاجیکستان باشکېنتی دوشنبه شهریده "تینچلیک و ترقیات اوچون بیرلیکنی مستحکملش" دېب ناملنگن آسیا یوره گی - استانبول پروسه سی تۉقیزینچی دور ییغینینی بۉلیب اۉتدی.

مذکور کنفرانس ده جمهور رئیس غنیدن بۉلک، تاجیکستان جمهور رئیسی امام علی رحمان، قتنشووچی دولتلر نماینده لری و خلق ارا تشکیلاتلر وکیللری اشتراک قیلگن اېدیلر.

بیرینچیدن جمهور رئیس امام علی رحمان گپیریب جمهور رئیس غنی و باشقه قتنشووچیلرنی خوش کېلیب سیز دېب، بیز هر دایم افغانستان ده تینچلیک و برقرارلیک تامینله نیشینی ایسته یمیز دېدی. منطقه ده گی تینچلیک و برقرارلیک افغانستان نینگ تینچلیک و برقرارلیگیگه بی واسطه باغلیق دېدی او.

تاجیکستان جمهور رئیسی نینگ ایتیشیچه، افغانستانلیکلر تشقی اره لشوو عاملی بۉلمیش تحمیل اېتیلگن اوروش و نا برقرارلیکلردن هر کون جدی زیان کۉره دیلر، بو بیزلرنی هم خواطرگه سالگن دیر و منطقه مملکتلری افغانستاننی تحمیل اېتیلگن معمالرگه نسبتن یالغوز قۉیمس لیگی کېره ک دیر.

قۉشمه عنعنوی چېگره لر منطقه دولتلرینی بیر- بیراوی بیلن باغله یدی دېیه اشاره قیلگن رحمان جنابلری، افغانستان بیلن تورلی ساحه لرنی اۉز ایچیگه آلگن همکارلیکلریمیز صفتینی آشیریشده کوچلی عزم و اراده میز بار و اونی کوچه یتیره میز دېدی.

جمهور رئیس رحمان، افغانستان ده تجارت و ترانزیت رواجله نیشی یۉلیده مملکتی نینگ همکارلیگیدن سۉز بېردی. تاجیکستان افغانستانلیک متخصصلرنی تورلی ساحه لرده اۉقیتیش و اۉرگه تیشگه تیار اېکنینی بیلدیردی.

اوشبو کنفرانسگه میزبانلیک قیلگن تاجیکستان جمهور رئیسی امام علی رحمانگه اۉز صمیمی منتدارچیلیگینی بیلدیریب گپیرگن مملکت جمهور رئیسی محمد اشرف غنی، افغانستان و تاجیکستان نینگ مناسبتلری بیر- بیراویگه بۉلگن ایشانچگه استوار دیر و سیزلرنینگ مهمانوازلیک همده فخرلی دوکتورانی کمینه گه اعطا اېتگنینگیزدن نهایت ممنونمن.

مملکت رهبری محمد اشرف غنی، افغانستان و تاجیکستان اۉرته سیده گی چېگره همکارلیک نمونه سی صفتیده آچیق چېگره و همکارلیککه ایله نیشی کېره ک و بیزلرنینگ طرح و برنامه میز هر ایکّی دولت خلقی نینگ آسایشته یششیگه سبب بۉلیشی مقصدیمیزگه موافق دیر.

جمهور رئیس غنی جنابلری نینگ کۉپه یتیریشیچه، افغانستان آسیا چهارراهه سی همده مهم محل حیثیده اۉزی نینگ رولینی بجره دی. باشقه تاماندن جمهور رئیس، ترورچیلیک، مخدره ماده و یشش محیط بۉییچه اۉزگریش خصصویده گی قیینچیلیکنی هم تیلگه آلدی.

افغانستان دولتی منطقوی پروژه لر عملگه آشیریلیشی تۉغریسیده هر قنده ی همکارلیک قیلیشگه تیارلیگینی تیلگه آلدی جمهور رئیس غنی. بیزلر الله نینگ همکارلیگی بیلن خشونت و ترورچیلر اوستیدن غالب چیقب دایمی همده شرفلی بیر تینچلیک و برقرارلیککه اېریشه میز دېیه بیلدیردی.

افغانستان تینچلیک لایحه سی درست یۉلگه یۉنلتیریلگنی اوچون منطقه دولتلری، شریکلر و خلق ارا تشکیلاتلر سعی و حرکتیدن تشکرلیک قیلگن جمهور رئیس غنی، افغانستان ده تینچلیک و برقرارلیک تامینله نیشی برچه میزگه آکسیجن کبی مهم و حیاتی دېب اظهار قیلدی.

تینچلیک نه ‌فقط ایستک، بلکه‌ بیزنینگ دالضرب احتیاجیمیز دیر دېگن جمهور رئیس غنی، افغانستانلیکلر ۴۲ ییلدن بېری تینچلیک و برقرارلیکده یَشش حقینی قۉلدن بېریب کېلگنلر دېدی.

سۉزی نینگ آخریده جمهور رئیس غنی، افغانستان خلقی اۉز کېله ‌جگیدن امیدوار، بیز امیدیمیزنی یۉقاتمه‌ی میز و افغانستان حکومتی و اونینگ خلق‌ ارا شریکلری تینچلیک و برقرارلیک بۉییچه‌ عمومي توشونچه‌ گه اېگه‌ لر.


اولَش