جمهور رئیس غنی: مهمند خلق ارا شفاخانه سی قوریلیشی، کمال خان توغانی سینگری برچه افغانلر اوچون فخر دیر

۰۲ ثور ۱۴۰۰

بوگون اېرته لب دولت نینگ یوقاری مرتبه لی هیاتی باشچیلیگیده قندهار ولایتیگه سفر قیلگن افغانستان اسلامی جمهوریتی جمهور رئیسی محمد اشرف غنی، بو ولایتگه باریش بیلن مهمند ایکّی یوز اۉرینلیک خلق ارا شفاخانه نی رسماً آچدی.

جمهور رئیس غنی جنابلری جمهورلیک ریاستی نینگ بیرینچی اۉرین باسری، ملی خوفسیزلیک مصلحتچیسی، جمهورلیک ریاستی ایشلری بۉییچه عمومی اداره باشلیغی، کابینه نینگ بیر قنچه اعضالری، قندهار والیسی و ملی کېنگش ده قندهارلیک نماینده لر آرقه لی همراهلیک قیلگنلر اېکن، جمهور رئیس شفاخانه میدانیده گی لوحه یوزیده گی پرده نی کۉرتیش بیلن مهمند ایکّی یوز اۉرینلیک شفاخانه نی آچیب مذکور شفاخانه نینگ ساغلیق مسووللری ییغینیده اشتراک قیلیشدی.

اوشبو جلسه ده، دستلب افغانستان سرمایه یاتقیزیش و تجارت اتاقی معاونی یونس مهمند گپیریب، تاجرلرگه دولت تامانیدن قولیلیک یره تیلیشی، مملکت ده سرمایه یاتقیزیش اوچون اولرنی ترغیب اېتیش و بو تۉغریده دولت نینگ توجه قیلیشی کبی ایستکلرینی بیلدیردی.

کېیینچه لیک مهمند گروپ رئیسی صدیق مهمند، مهمند خلق ارا ایکّی یوز اۉرینلیک شفاخانه سی کرونا ویرویس ییره گن قیین بیر شرایط ده غرب حوزه سی اینیقسه قندهار خلقی گه زمانوی خذمت کۉرستدی دېب اَیتدی. اونینگ سۉزلریگه کۉره، بوندن کېیین وطنداشلریمیز، قاله ویرسه مذکور حوزه نینگ اهالیسی دواله نیش اوچون مملکت دن تشقری کېتیشگه احتیاجلری یۉق.

سۉنگره جمهورلیک ریاستی نینگ بیرینچی اۉرین باسری امرالله صالح اوشبو شفاخانه آچیلیشینی تبریکلب، حکومت خصوصی سکتور بیلن یقین علاقه ایجاد قیلگن و اقتصاد رواجله نیشی اوچون خصوصی سکتورنینگ رولی تقدیرگه لایق دیر دېب اَیتدی.

جمهورلیک ریاستی نینگ بیرینچی اۉرین باسریگه کۉره، مهمند گروپی نینگ مسووللری بونده ی بیر شرایط ده مملکت ده سرمایه یاتقیزگنلر، بو اېسه اولرنینگ اولکه گه بۉلگن محبتینی کۉرسته دی و باشقه بیر تاماندن بو سرمایه یاتقیزیش، مملکت دن سرمایه نینگ چیقاریشنی آلدینی آله دی.

اولرنینگ صحبتلرینی اېشیتگن عالی جناب جمهور رئیس غنی، مهمند شفاخانه سی نینگ آچیلیشینی برچه وطنداشلر اینیقسه قندهارلیکلرنی تبریکله دی. مهمند شفاخانه سی قوریلیشی، کمال خان توغانی کبی افغانستانلیکلر اوچون بیر فخر حسابلنه دی دېدی غنی جنابلری.

اولکه جمهور رئیسی نینگ سۉزلریگه کۉره، بوگون بیزلرنینگ ساغلیق بۉییچه تاریخیمیزده ینگی بیر فصل  دېب مهمند شفاخانه سی نینگ طبی جهازلری و زمانوی خذمتلرینی آلقیشله دی.

کابینه نینگ اعضالریگه بویروق بېرگن غنی جنابلری، بوندن کېیین دولت نینگ بلند مرتبه لی رسمیلری مهمند شفاخانه سیده دوالنسینلر احتیاج بۉلگن تقدیرده، دواله نیش اوچون چېت اېلگه کېتیشلری ضرور لیگینی بیلدیردی.

خلق ارا حربی قۉشینلر مملکت دن آلیب چیقلیشی گه اشاره قیلیب گپیرگن مملکت جمهور رئیسی، اوروش اوچون باشقه دلیل یۉق دیر؛ افغانی همت، بیرلیک، اراده و درک بیلن بو اولکه نی توزه ته یلیک دېب ینه بیر بار طالبلرنی صلح گه اونده دی.

جمهور رئیس غنی سۉزلری نینگ یکونیده، مهمند شفاخانه سی ینگی بیر قندهار نینگ سیماسی دیر بو شفاخانه مسووللری نینگ برچه ایستک و پیشنهادلریگه ییتیشیله دی.

مهمند شفاخانه سی آچیلیشی مناسبتی بیلن اۉتکزیلگن ییغین ده مهمند گروپ رهبرلیک اعضاسی، قندهارلیک بویوکلر شرف سَله سینی جمهور رئیس غنی باشیگه قۉییب بیرته تۉننی اونگه ساوغه قیلدیلر.


اولَش