جنیوا ۲۰۲۰ کنفرانسی نینگ ایککینچی کونی افغانستان باره سیده  بولیب اوتدی

۰۴ قوس ۱۳۹۹

جنیوا ۲۰۲۰ کنفرانسی نینگ ایککینچی کونی افغانستان حقیده "تینچلیک، رفاه و خودکفایلیک" عنوانی آستیده جاری ییل 4  قوس سه­شنبه کونی توشدن سونگ یولگه تشلندی. افغانستان اسلامی جمهوریتی دولتی، فنلند دولتی و بیرلشگن ملتلر سازمانی میزبانلیگیده یولگه تشلنگن اوشبو کنفرانسده 70 دن آرتیق اولکه و 30 جهانی سازمان قتنشگندی.

افغانستان اسلامی جمهوریتی نینگ جمهور رئیسی محمداشرف غنی اوز صحبتیده یاردم ایتگن اولکه لر حمایتینی آلقیشلب بو کمکلر دوامی کیره کلیگی اوستیده تأکیدله دی.

جمهور رئیس محمداشرف غنی 2020 جنیوا کنفرانسینی افغانستان اوچون اهمیتلی بولگنینی ایتیب بو کنفرانس افغانستان و بین‌المللی همکارلر تلاشلری و همکارلیکلری نتیجه سیده یولگه قوییلگن دیدی.

جمهور رئیس غنی کنفرانسده شریک بولگن اولکه لردن افغانستان دولتی و خلقینی حمایت قیلیشلری کیره کلیگی گه تأکید قیلیب مستقل، ثباتلی واحد و دموکراتیک  افغانستان و ایککی دهه ده قولگه کیریتیلگن یوتوقلرنی سقلش افغانستان دولتی و خلقی همده دنیا همجمعیتی نینگ قوشمه قره شینی تشکیل بیره­دی.

محمد اشرف غنی اوچ اصل صلحسازلیک، دولتسازلیک و مارکیت‌سازلیککه تأکید قیلیب انکشافی اجندامیزنینگ اساسی موضوعی آز منبع و امکانیت بیلن تشویشلی قیینچیلیکلر قرشیسیده کوپراق ایشلش بیلن توقعلرنی قولگه کیریته آله میز دیدی. جمهور رئیس جنابلری بو هدفلرگه ایریشیش اوچون کیفیت، سرعت و جوابگویلیک و حساب بیریشنی کوز اونگیمیزده توتیشیمیز کیره ک دیدی.

جمهور رئیس غنی سوزلری نینگ بیر بولیمیده  امنیتی و دفاعی کوچلر توانیدن ایسلب 2011 ییلی بین‌المللی کوچلر بیر یوز و ایللیک مینگدن بوگونگه اون مینگدن آزراققه توشیریلگنینی بیلدیریب افغانستان امنیتی و دفاعی کوچلری امنیت همده 2015 ییلده تروریزم گه قرشی کوره ش عملیاتلری مسؤولیتینی همده نظامی عملیاتلرنینگ 96 فایزینی مستقل شکلده عملگه آشیرگنینی تیلگه آلدی.

بو پیتده بیز جهانی تروریزم گه قرشی کوره شیش نینگ بیرینچی خطیده ایدیک. بو زمانده بیز مملکت ولایتلرینی قوریدیک و کنترولیمیز آستیده سقله دیک. طالبلر موقت شکلده بیر تومننی قولگه کیریتیشگه اورینگنده بیز تیز اقدام بیلن اونی قیته قولگه آلردیک.

جمهور رئیس غنی افغانستانده اوتگن بیش ییلده امنیتی و دفاعی، یخشی حکومتدارلیک، دولت اداره لری ساختارینی جوانلشتیریش، سوز ایرکینلیگی و فسادگه قرشی کوره ش بولیملریده کوپ ایش بولگنینی بیلدیردی.

جناب جمهور رئیس فسادگه قرشی کوره شیش کمیسیونی ایجاد ایتیلگنینی ایتیب بیز بین‌المللی همکارلر یاردمی بیلن 2024 هدفلریگه ایریشیش نیتیده فسادگه قرشی کوره شیش اوچون جامع بیر استراتیژی اوستیده ایشلب تورگنمیز دیدی.

جمهور رئیس عامه مالی مدیریتی خصوصیده گپیریب بودجه مصرفینی 90 فایز کوپه یتیرگنمیز دیدی. ولایتلر یشاوچیلری نینگ نیازلری حل بولیشی اوچون بودجه تخصیص ایتیلگنینی بیلدیریب بو اساسی اولویتیمیز دییدی. حاضرچه لیک بیز معارف، شهری انکشاف، انرژی و زیربنا اوستیده تمرکزلریمیزنی نیچه برابر قیلگنلیگینی بیان قیلدی.

ایتیلیشیچه بو کنفرانس کرونا ویروس ترقه لیب کیتمسلیگی اوچون ویدیو کنفرانس آرقه لی بولیب اوتدی.

اوشبو کنفرانس نینگ اساسی موضوعی اقتصادی یاردملر، اداری فسادگه قرشی کوره شیش، زیربنالر کینگه ییشی، دنیا همجمعیتی اقتصادی یاردملرینی مصرف قیلیش چارچوبه سی تعیینی، اقتصادی ثبات و یاردملر دوامی و افغانستانده تینچلیک اورنه تیش تشکیل بیرردی.  شونینگدیک افغانستان حکومتی و دنیا همجمعیتینی قوشمه انکشافی هدفلر تدوینیگه متعهد قیلیش و افغانستان حکومتیگه مالی حمایت دن اطمینان بیریش ایدی. افغانستان نینگ طالبلر بیلن دوام ایتیب کیله یاتگن تینچلیک مذاکره لری بو کنفرانس نینگ جانبی مساله لریدن ایدی.

افغانستان حقیده یولگه تشلنگن ایککی کونلیک 2020 جنیوا کنفرانسیده عضو مملکتلر و سازمانلر، افغانستانده دایمی تینچلیک، آسایشته لیک اورنه تیش کیره کلیگینی بیلدیریب ثباتلی واحد افغانستان اسلامی جمهوریتی دولتینی حمایت قیلیشلرینی ایتدیلر.

 


اولَش